القيادة الرشيدة في عهد خادم الحرمين الشريفين الملك عبدالله بن عبدالعزيز فتحت أبواب الحوار والشفافية بين المواطن والمسؤول بين الراعي والرعية ولعل نهج خادم الحرمين الشريفين حفظه الله ورعاه هو التواصل بين المواطن والمسؤول وتحقيق العدالة والمساواة بين المواطنين بكل بقعة من ارض الوطن.
حيث يعرف الجميع أن أمراء المناطق ومحافظي المحافظات مسئولين أمام الله تعالى في الأمانة التي أٌوليت لهم في تلمس وتفقد احتياجات المواطن والوقوف على كل صغيرة وكبيرة ورغم ذلك لدينا نحن المواطنون بعض الأسئلة وبعض الاحتياجات التي تجول في خواطرنا كل يوم ونطرحها بلغة الشيوخ والأرامل والأطفال والنساء والمواطن البسيط ،وهذه رحلة مع الأمير والمحافظ وأحلام سعيدان.
يا صاحب السمو وأنت يا سعادة المحافظ وددنا لو تخرج من بيتك وتأخذ سيارة احد المواطنين في عز "القايلة" وتحاول تفتح مكيف السيارة يمكن يشتغل ولا تنسى ياطويل العمر تفتح درج السيارة وبتحصل استمارة منتهية إذا عندك وقت مر المرور وصف مع طوابير المنتظرين عشان تسدد القسايم وتشوف هي مدبلة عليك وإلا ناسينك وإذا انتهيت من المرور مر المستشفى وحاول تدور لك موقف أو انتظر ساعة أو أقل حتى يخرج احد المرضى من الموقف وتوقف في مكانه وأتجه مباشرة للعيادات أو الطوارئ شف أول موظف بالاستقبال ذاك اللي مرسم كأنه سموكم الكريم ، قل له أبي عيادة السكر بعيداً عنك ياطويل العمر بيعطيك ورقة ونفسه على رأس خشمه، وبتنتظر في كراسي الاستقبال لين ينزل السكر معاك ويرتفع وينزل مثل مؤشر الأسهم وبعده بتدخل على الطبيب ترى اسمه شهندر من أقليم البنجاب شهادته من السوق الحرة بألف دولار أنواع الرخص ولا يروح تفكيرك بعيد السوق الحرة ترى جامعة مرموقة ، بيسألك كم عمرك قل عمرك الافتراضي أو الصحي المهم بيعطيك مسكنات لمدة ثلاثة أيام وبيقول تراجعنا، بعدها بتروح للصيدلية وبتلاقي الصيدلي في فسحة مع الممرضة " نارمين" وبيدها جوال بلاك بيري وردي من اختيار المواطن الصيدلي واللي طاقن حنك معاها لا تنهره وتقوله استعجل تراه بيقول لك وأنت شايفنا نلعب ، تعرف النفوس شينه هالأيام.
وبعد كذا اتجه ياطويل العمر لحي من الأحياء الشرقية اوالجنوبية القديمه شوي(عفوآ الشعبية) وانتبه من السرعة المحددة لا تتجاوز 90كم بالساعة شف اللوحات الإرشادية بكل زاوية ما شاء الله على نظام ساهر ما نسى اللوحات حطها قبل تطبيق الخدمة وترى المرور صاحي وأفرادهم ما شاء الله مدربين تدريب عالي ويكرهون شي اسمه سرعة سيارات ولو تبيني احلف ما عمرهم طلعوا واحد من الحجز بواسطة ،المهم إذا دخلت للحي اربط حزام الأمان ترى الشوارع الله يهدي الأمانة كل يوم تنظفها وتحفرها من جديد من زود الأمانة ولا تقرب من الأشجار اللى بالشارع ترى مرة يقولون طاحت على سيارة " ذعار" لكن الحمد لله ماجاه شي الإ كسر بالجمجمة ، وأبشرك حصل سرير بالمستشفى بعد أسبوع بعد ما نشف مخه ،والحين أبشرك ما يفرق بين الشجرة والبقرة .
يا طويل العمر إذا دخلت الحي تعوذ بالله من الشيطان الرجيم بتشوف مناظر مهولة وغريبة بتشوف بيت عليه حفريات من كل جهة وبتشوف بيت عنده حفرة عميقة لشركة الكهرباء لها سنة محفورة الظاهر ينتظرون يطلع لهم نفط ،وبتشوف بيت أمامه سيارة داتسون موديل 70 متهشمة ومنتهية مكتوب عليها تالفة لها خمس سنوات ماحد حركها ولا شالها من مكانها ،المرور يقول مسؤولية الأمانة والأمانة تقول مسؤولية المرور، وبتشوف الماء يطلع من بيت ويدخل في البيت الثاني تعرف الأرض لها جاذبية وأنت بالحي ترى بتشوف سطوح بعض المنازل وانتبه لا تكشف عوراتهم وتصير مشكلة بالفتوى تعرف طال عمرك هالايام الناس مسعورة بالفتاوى ولا تستغرب ياطويل العمر إذا شفت موظفي الضمان الاجتماعي يتفقدون أحوال المواطنين والعجزة والأرامل والفقراء ونسيت أقولك ترى البيت اللي قدامه الداتسون لموظف بالضمان ،و بوصف لك بيت بس بصراحة بنتعب وحنا نوصفه لأن ترقيم المنازل يقولون يبي ميزانية تقدر بــ خمسمائة مليون مع الخبير الأجنبي تعرف ماعندنا عيال بالبلد معاهم هندسة ميدانية أو معمارية المهم خذ جولة على الحي وادري والله أتعبناك ياطويل العمر بس عاد الشكوى لله ودنا تشوف الرفاهية والحياة الكريمة ، المهم إذا انتهيت من الحي وقف عند اقرب بقاله ترى العامل أفغاني لاتسأله عن إقامته لانه صهر مسئول أو مدير الإدارة الفلانية ، خذ جريدة الجزيرة أو الرياض وتصفح المحليات وشف وشلون الوضع بتلاقي كل شي تمام ، شفت ياطويل العمر اللى شفته قبل شوي بالحي ترى اختفى بالجريدة بقدرة قادر شفت وشلون الكرامات.
المهم ما ودك تمر عاد حي في الشمال وإلا تدرى لا تمر الحي اللى بالشمال لانه فيه حصانه وكبارية القوم وما عندهم نقص بالخدمات إلا خدمة وحدة يحتاجونها وهي انه ما يسكن حولهم " أعرابي"
وإذا انتهيت من الحي اللى بالشمال ياطويل العمر وش رأيك تروح ( للقرى والخبوب والأرياف ) بس لا تنسى تأخذ معاك ماء للشرب" وماء للرديتر" تحسباً للظروف ، المهم ياطويل العمر خذ جولة على القرية وانتبه من " القلبان " ترا بكل زاوية " قليب" تعرف مصلحة المياه من زود النعمة محفرينها الظاهر للحيوانات وأنصحك يا طويل العمر لا تشرب منها ترى يقولون نسبة التلوث فيها عاليه ، لا تتعجب.. القروية والخبوبية ما يموتون بسرعة
شف عاد الخدمات بقرية يتجاوز عدد سكانها (10000) الآف نسمة مافيها إلا رئيس مركز وعنده ثلاثة من الخوياء تصدق أن اعلي راتب فيهم (1750) وحنا نحسب الخوي راتبه كثر راتب الوزير نشوف ها الكشخة والكحل ملْ العيون نحسب أنهم شبعانين.
وإذا طال عمرك صدع راسك بعيد عنك ترى ما فيه مركز صحي بالقرية والسبب يقولون أن وزير الصحة مدرجة ضمن الخطة الخمسية اللى لها ثلاثين سنة ، وإذا قرب وقت الصلاة شف المسجد اللى بالحارة وترى مكيفاته ما تبرد يعني طال عمرك الله يعينك على الحر اذا دخلت المسجد طالع فوق بالسقف بتشوف تصدعات وآثار مياه، عادي ترى المسجد " يخر" بس حنا بالصيف ما من خوف ، وإذا طلعت من المسجد شف البيت المقابل للمسجد فيه شايب كبير بالسن له خمس سنوات يقدم على الضمان الاجتماعي ويعتذرون له بسبب أن عنده عامل يسوق فيه تعرف طال عمرك السواقين للكبارية بس ، ومر على جاره بتلاقي عجوز أرملة يصرف لها الضمان كل نهاية شهر (400) ريال والجمعية يعطونها ثلاثة كيلو سكر وهي مريضة بالسكر اصلأ ويعطونها كل (4) أشهر(80)ريال تعرف لزوم الأغراض من تسديد كهرباء ومصاريف علاج وملابس العيد ، يا طويل العمر اذا دخلت البيت شف واحد من عيالها عمره فوق 35 ما تزوج ولا توظف تدرى ليش ما معاه إلا شهادة الثانوي وقدم على كل الوظائف ولا يقبلونه تعرف يبي له اعتماد أو واسطة قوية ، اذكر قدم مرة على العسكرية وطردوه تدري ليش لان طوله اقل من 168سم وتصدق باقي له نص سم ويكمل الطول القانوني ، لكن بصراحة نلومه لانه ماكان يتغذي زين أيام كان طفل تعرف النشويات والسكريات والبروتينات مهمة بس المسيكين كان ما ياكل إلا رز تعرف اللحم غالي.
يا طويل العمر بطلب منك طلب ارجع بس لا تشوف أكثر من اللى شفت، وسامحني طال عمرك على أحلامي .


عبدالله سلمان